PARISKO GELTOKIAN

Parisko geltokian
Gare du nord-en, Gare Saint Lazare-en
zer axola dio non

Bada gizon bat
gabardina luzea
kapelik ez, Hotel de Ville-ko argazki horretan bezala

Dena txuribeltzean

Euria ari du
euria gizona lurperatu nahian indartsu
gizona uzkurtuta lur hotzean
bere barrura begiratu nahian bezala
nasaren amaieran, geltokiaren horizontean

Emakumearen ahotsa du barruan
hain gertu
hain berea
"agur" esaten
behin eta berriz "agur"
Agian elkarri gehien esan dioten hitza da

Uzkurtuta jarraitzen du
emakumearen ahotsa
emakumea bera era horretan betirako gorde nahiko balu bezala
euriaren mende uzkurtuta

Berandu da dagoeneko edozer esateko
berandu da akaso ezer amesteko
beranduegi

Emakumearen ahotsa
azala begiak bularrak lurruna bere ezpainak sexua bere hitzak hauen tonua
ahotsa ahotsa du buruan
agur esanez
Eta gizonak pentsatzen du
euriak gabardina eta guzti nasan lurperatzen duen bitartean
Euriak gutxienez
herdoilduko al ditu nire ametsak




































































Agur.